Mwenyekiti wa kamati ya Miundombinu  Selemani Kakoso (MB) ameutaka uongozi wa Mamlaka ya Usimamizi wa Bandari Tanzania (TPA) kuendelea kutafuta  wateja katika nchi za Uganda , DRC Kongo na Sudani ya Kusini.

Kakoso ameyasema hayo wakati wa kikao cha Kamati ya Miundombinu ya kujadilia taarifa za utendaji kazi ya Mamlaka ya Bandari  Tanzania (TPA)  jijini Dodoma.

“ Bandari Dar es Salaam inauwezo wa kuhudumia mizigo kutoka DRC -Kongo, Uganda , Zambia na Malawi kwa kiwango kikubwa hivyo TPA hakikisheni  mnakwenda kutafuta wateja katika nnchi hizo”, Alisema Kakoso.

Pia Kamati hiyo ya miundombinu imeagiza TPA kuhakikisha wanakamilisha Mchakato wa Ujenzi wa Matanki ya Mafuta katika eneo la kigamboni kwani  matanki hayo ya mafuta yatakuwa na uwezo wa  kupokea mafuta kiasi cha mita za ujazo 360,000. Ambapo ujenzi wake upo katika hatua za manunuzi.

Kwa upande wake Naibu Waziri wa Uchukuzi David Kihanzile amesema kuwa  Wizara  ya Uchukuzi na TPA wanaendelea na kazi ya Kuandaa mpango kabambe  wa kufikia   masoko ya nchi za Uganda, Malawi, DRC-Kongo, Zambia , na Zimbambwe.

Kihanzile amesema kuwa Serikali inandelea na mchakato wa  kujenga  kuboresha miundombinu ya usafishaji katika ukanda wa kusini mpaka ziwa Nyasa, pamoja na uboreshaji wa Barabara na Reli katika Bandari ya  Kalema na kuboresha ujenzi wa Meli katika ziwa Tanganyika na Victoria.

Huku naibu mkurugenzi Mkuu wa Mamlaka ya Usimamizi wa Bandari (TPA) Juma Kijava amesema kuwa kwa sasa mamlaka hiyo inaendelea na uboreshaji  wa Bandari ya Tanga, Kigoma, Mtwara na Nyingine.