Naibu Waziri wa  Wizara ya Uchukuzi Mhe. David Kihenzile amezitaka taasisi zilizopo chini ya Wizara kuongeza kasi ili kufikia malengo waliojiwekea ikiwa ni pamoja na kukamilisha miradi mbalimbali ya maendeleo iliyoko chini yao kwa wakati  na thamani halisi ya fedha.

Kihenzile ameyasema hayo leo tarehe 25 Oktoba,2024 wakati akifuga mkutano wa 17 wa tathmini ya utendaji wa Wizara  ya Uchukuzi uliofanyika Kwenye Kituo cha Mikutano cha Kimataifa cha Arusha(AICC)

“Wizara ya Uchukuzi ni injini muhimu ya maendeleo ya Taifa lolote ,Uchumi wa kisasa hauwezi kuimarika bila kuwa na mifumo ya usafiri iliyo bora, inayotegemeka na ya kisasa,”amesema Kihenzile

Kihenzile amesema lengo la Serikali ya awamu ya sita inayoongozwa na Dkt Samia Suluhu Hassan ni kuboresha miundombinu yote nchini  ikiwemo ya Uchukuzi ili kuongeza ufanisi katika utoaji huduma kwa wananchi.

Naibu Waziri Kihenzile amewataka washiriki wote kutoka idara , taasisi na wadau wa Usafirishaji nchini  kuhakikisha wanaiweka mipango na mikakati iliyojadiliwa kwenye utekelezaji ili kufikia ufanisi uliokusudiwa.

Kwa upande wake  Katibu Mkuu wa Wizara ya Uchukuzi Prof Godius Kahyarara kupitia Mkutano huo  masuala muhimu ikiwemo utekelezaji wa miradi ya kimkakati ya maendeleo kama ujenzi wa meli, reli ya SGR, maboresho na upanuzi wa bandari, ununuzi wa ndege, miundombinu ya vyuo vya usafirishaji, umuhimu wa mabadiliko ya sera ya uchukuzi yamekamilika kwa mawanda yake.

Naye muwakilishi kutoka sekta binafsi Mha. Munina Wakyendo amesema Wizara ya Uchukuzi ni kichocheo muhimu kwa kuinua sekta zingine na uchumi hivyo vikao vya maboresho na majadiliano vitawasaidia wawekezaji kujua fursa za kuwekeza kwa kuwa na uhakika wa kutatuliwa changamoto zao na kuahidi kuendelea kufadhiri miradi ya kimkakati nchini.