Chuo cha Bahari Dar es Salaam (DMI) kimesaini makubaliano ya ushirikiano (MoU) na kampuni kubwa ya usafirishaji wa majini duniani, COSCO Shipping Specialized Carrier Co LTD ya nchini China , katika hafla iliyofanyika Tarehe 15 Septemba, 2025 kwenye ukumbi wa Mamlaka ya Bandari Tanzania (TPA) Jijini Dar es Salaam.

Akizungumza katika hafla hiyo, Katibu Mkuu wa Wizara ya Uchukuzi Prof. Godius Kahyarara amesema ushirikiano huu ni hatua muhimu ya kukuza taaluma ya baharini nchini na kuongeza nafasi za ajira kwa vijana wa Kitanzania kupitia mafunzo ya vitendo na ajira kwenye meli za kimataifa.

“Makubaliano haya ni sehemu ya utekelezaji wa mkakati wa Serikali wa kukuza uchumi wa buluu (blue economy),Serikali itaendelea kuunga mkono jitihada kama hizi ili kuhakikisha sekta ya baharini inachangia kikamilifu kwenye uchumi wa taifa,” amesema Kahyarara

Kwa upande wake, Mkuu wa Chuo cha Bahari Dar es Salaam(DMI) Prof. Tumaini Gurumo  amesema makubaliano haya yataleta mageuzi makubwa katika mitaala na mafunzo ya wanafunzi, sambamba na kuongeza hadhi ya DMI kuwa kitovu cha mafunzo ya bahari katika ukanda wa Afrika Mashariki na Kati.

“Tunataka wanafunzi wetu wapate uzoefu wa moja kwa moja katika mazingira ya kimataifa na kuendeleza taaluma yao kwa kiwango cha juu,” amesema Prof.Gurumo.

Naye Meneja  Mkuu wa kampuni ya  COSCO Shipping S.P.E Bw. Huang Nan amesisitiza dhamira ya kampuni hiyo kushirikiana na DMI kwa karibu, akibainisha kuwa Tanzania ina fursa kubwa ya kukuza sekta ya usafirishaji majini na kutoa mchango mkubwa katika soko la ajira la kimataifa.

Ameongeza kuwa kampuni ya COSCO kwa kushirikiana na ile ya SINOTASHIP wako tayari sasa kuipatia nchi ya Tanzania meli kubwa ambayo itakuwa ikisafirisha shehena kutokea hapa Nchini kuelekea mashariki ya mbali hali itakayosaidia kuongeza ushindani na ufanisi wa bandari zetu  na kuwaongezea uzoefu wataalamu wetu wa ndani

Makubaliano haya ya kihistoria yanatarajiwa kuimarisha ubora wa mafunzo ya baharini, kuongeza fursa za ajira kwa Watanzania na kuunga mkono juhudi za Serikali za kukuza sekta ya baharini na uchumi wa Taifa.